Miðvikudagur, 11 október 2017 21:36

Ólafsfirðingar , áfram ber að sjóða neysluvatn við Hlíðarveg, Hornbrekkuveg og Túngötu

Mengunin í vatnsveitu Ólafsfjarðar er bundin við vatnsbólið í Brimnesdal og hefur Veitustofnun Fjallabyggðar einangrað bólið frá veitunni að undanskildum húsunum við; Hlíðarveg, Hornbrekkuveg og Túngötu.  Neysluvatn í öðrum götum en taldar eru upp hér að ofan er ómengað og því hæft til neyslu.

Flestar E. coli bakteríur eru skaðlitlar, en ef E coli finnst í neysluvatni, þá bendir það til þess að hættulegar bakteríur geti leynst í vatninu. Íbúum við ofangreindar götur er því ráðlagt sem varúðarráðstöfun að halda áfram að sjóða vatnið. Veitustofnun Fjallabyggðar hefur nú þegar hafið vinnu við endurbætur. 

 

 

 

Sunnudagur, 08 október 2017 11:46

Sjóða ber neysluvatnið á Ólafsfirði

 

Staðfest hefur verið að sýni sem Heilbrigðiseftirlitið tók þann 5. október sl. á Ólafsfirði, innihéldu Escherichia coli (E. coli) gerla. Vatnsveitan á Ólafsfirði fær vatn úr 2 vatnsbólum þ.e. úr Múla og Brimnesdal. Niðurstaða sýnatöku gefur til kynna að vatnsbólið sem þjónar einkum nyrðri hluta bæjarins m.a. fiskvinnslunum á Ólafsfirði sé í lagi og vandinn sé bundinn við vatnsbólið í Brimnesdal.

Flestar E. coli bakteríur eru skaðlitlar, en ef E. coli finnst í neysluvatni, þá bendir það til þess að hættulegar bakteríur geti leynst í vatninu. Íbúum er því ráðlagt sem varúðarráðstöfun að sjóða vatnið.  Umhverfis- og tæknideild Fjallabyggðar hefur verið upplýst um málið og hefur nú þegar hafið vinnu við endurbætur.   

 

Föstudagur, 06 október 2017 15:55

Heilbrigðiseftirlitinu heimilt að fjarlægja númerslausa bíla í slæmu ástandi af einkalóðum

 

Í nýjum úrskurði úskurðarnefndar umhverfis- og auðlindanefndar sem kveðinn var upp þann 3. október sl. kemur skýrt fram að heilbrigðiseftirlitið hefur heimild til þess að fjarlægja númerslausa bíla á einkalóðum, á þeirri forsendu einni að um væri að ræða lýti á umhverfinu. Úrskurðað var í kærumáli á hendur Heilbrigðiseftirliti Suðurnesja sem fjarlægði, númerslausan ryðgaðan bíl í slæmu ástandi, á einkalóð. Hingað til hefur Heilbrigðiseftirlit Norðurlands vestra litið svo á að ríkari forsendur þyrfti til þess að fjarlægja númerslausa bíla af einkalóðum  s.s. að olía væri að leka af bílum eða þá að rúður og ljós væru brotin þannig að slysahætta stafaði af bílflökum.  Það er ljóst að úrskurðurinn auðveldar mjög tiltekt á einkalóðum.   

Þriðjudagur, 25 júlí 2017 18:03

Afnám eftirlits með heimagistingu og fjölgun snyrtinga á veitingahúsum

Þann 21.júní sl. voru gerðar breytingar á reglugerð um hollustuhætti nr. 941/2002 og tóku breytingarnar gildi strax við birtingu reglugerðarinnar. Meginefni breytinga umhverfisráðherra á reglugerð um hollustuhætti fela í sér útfærslu á nýsamþykktum lögum um að rýmka reglur um heimagistingu. Ekki er lengur gert ráð fyrir reglulegu eftirliti né starfsleyfi Heilbrigðisnefnda sveitarfélaga.  Breytingarnar náðu einnig til fleiri þátta m.a um aukinn fjölda salerna á veitinga og samkomuhúsum.  Það gerðist með þeim hætti að felld voru á brott ákvæði í hollustuháttareglugerðinni um fjölda snyrtinga sem voru vægari, en kröfur sem er að finna í byggingarreglugerð. Nú standa því eftir  ákvæði byggingarreglugerðarinnar sem geta kallað strax á umtalsverðar breytingar á innréttingu veitinga- og samkomuhúsa. 

Image result for WC

Dæmi um áhrif breytinganna:

1) Lítið kaffihús með 4 borðum fyrir um 20 gesti þarf nú að bjóða gestum upp á 2 salerni, en fyrir breytingarnar var 1 salerni nægjanlegt.

2) Skyndibitastaður  með 12 borðum fyrir um um 60 gesti þarf nú að bjóða upp á 4 salerni, en fyrir breytingarnar voru 2 salerni nægjanleg.

3) Stór veitingastaður fyrir um 200 manns þarf nú að bjóða upp á 9 salerni, en fyrir breytingarnar voru 4 salerni nægjanleg.

Miðvikudagur, 07 júní 2017 14:28

 

Starfsskýrsla Heilbrigðiseftirlits Norðurlands vestra 2016

Starfsskýrsla Heilbrigðiseftirlits Norðurlands vestra fyrir árið 2016 má finna hér.

Í skýrslunni er m.a. fjallað um drög að nýrri reglugerð um fráveitur sem skýra þær kröfur sem gerðar eru til hreinsunar fráveituvatns og munu að öllum líkindum draga mjög úr kostnaði við gerð langra útrása fráveitna í sjó fram. Auknar kröfur verða hins vegar gerðar til vöktunar til þess að geta staðfest fullnægjandi ástand.

 

 

 

Þriðjudagur, 06 júní 2017 14:51

Gott öryggi á leikskólum

Í sjónvarpsfréttum RÚV þann 5. júní 2017, var fullyrt að eftirlit og ástand leiktækja á opinberum leiksvæðum m.a. leikskólum væri í molum.  Umræddar fullyrðingar sem fallnar eru til þess að valda foreldrum barna óþarfa ótta, standast ekki nánari skoðun.  

Heilbrigðiseftirlit sveitarfélaga skoðar alla leikskóla landsins reglulega og hafa nokkrir heilbrigðisfulltrúar sérhæft sig í öryggismálum leikvalla og - tækja.  Liður í opinberu eftirliti er að fara yfir skráningar á slysum og óhöppum í leikskólum og er ekkert þar að finna sem gefur til kynna að alvarlegum slysum á leikskólum hafi fjölgað til muna.  Heilbrigðiseftirlitið er víða í góðu sambandi við lækna heilbrigðisstofnanna vegna mála sem snúa að eftirlitinu.  Engin ábending hefur borist frá Heilbrigðisstofnunum á svæðinu, sem snýr að slysagildrum á leikskólum.  Í leikskólum starfa vel menntaðir leikskólakennarar sem hafa mjög góða þekkingu á þeim þáttum sem snúa að starfi og starfsumhverfi leikskóla. Þeir eru vel meðvitaðir um öryggismál og hafa gjarnan forgöngu um úrbætur á þeim þáttum sem þarfnast lagfæringa.  Fyrir utan opinbera eftirlitið og innra eftirlit leikskólanna sjálfra, þá fer fram faggild aðalskoðun á leikvallatækjum og leiksvæðum, í mörgum sveitarfélögum, á sviði faggiltra skoðunarstofa. Aðalskoðun er gerð á grundvelli reglugerðar 942/2002.   

Úrbóta á öryggi leiktækja er hins vegar  helst þörf hjá ferðaþjónum sem hafa ósamþykkt tæki á boðstólnum fyrir heimilsfólk og jafnvel gesti.  Það er nauðsynlegt að móta stefnu hvernig megi koma þeim málum í betra horf og skýra ábyrgð og kröfur til rekstraraðila.   

         

 

 
Fimmtudagur, 04 maí 2017 21:57

Fyrirspurnir vegna húsnæðis Ársala við Víðigrund á Sauðárkróki 

Heilbrigðiseftirlitinu hafa borist fyrirspurnir frá foreldrum um húsnæði yngri deildar leikskólans Ársala á Sauðárkróki við Víðigrund. Spurt hefur verið á þá leið hvort að mygla geti verið uppspretta veikinda barna og hvort til standi að loka húsnæðinu.

Heilbrigðiseftirlitið gerði athugun í apríl sl. og gáfu niðurstöður þeirrar athugana tilefni til að álykta að mygla í innilofti sé ekki vandamál í húsnæðinu, sjá  niðurstöður. Þess ber að geta að sömu aðferð var beitt til að meta ástand húsnæðis leikskólans á Hofsósi og niðurstöðurnar notaðar til þess ákveða flutning leikskólans í annað húsnæði, nú á vordögum.  Sveitarfélagið Skagafjörður hefur ekki látið staðar numið, í athugun á húsnæði Ársala við Víðigrund, við framangreinda athugun Heilbrigðiseftirlitsins. Til þess að ganga úr skugga um að húsnæðið uppfyllti ítrustu kröfur var ákveðið að óska eftir því  að verfræðistofan Efla gerði enn frekari athuganir á húsnæðinu. Þær fela m.a. í sér að bora í gegnum húsnæðið og meta ástandið út frá borkjörnum sýnanna. Heilbrigðiseftirlitinu hefur borist greinargerð sveppafræðings um skoðun á 2 borkjörnum, en út frá þeim er ekki tímabært að álykta almennt um ástand húsnæðisins og rétt að bíða eftir frekari niðurstöðum rannsókna Eflu.  

Heilbrigðiseftirlitið hefur verið í sambandi við heilbrigðisstarfsfólk á Heilbrigðisstofnun Norðurlands á Sauðárkróki og mun óska eftir samráði við það um framhald málsins.

Mikilvægt er að hafa það í huga að börn á leikskólum og dagheimilum eru tvisvar til sjö sinnum oftar veik en börn sem eru heima hjá sér.  Börn á aldrinum hálfs árs til 2. ára eru veik að meðaltali 24 daga á ári. Erlendar rannsóknir hafa gefið til kynnað að með betri handþvotti á leikskólum væri hægt að fækka sjúkdómstilfellum um 34%.   

 

 

 

 

 

 

 

Fimmtudagur, 23 febrúar 2017 15:51

Samræmd starfsleyfisskilyrði fyrir heimagistingu

 

Umhverfisstofnun og heilbrigðiseftirlitin hafa gefið út samræmd starfsleyfisskilyrði fyrir heimagistingu sjá hér.

Fimmtudagur, 23 febrúar 2017 14:39

Nýjar reglur um brauðbari í verslunum

Matvælastofnun hefur gefið út leiðbeiningar um sölu á óvörðu brauði í sjálfsafgreiðslu í verslunum. Hér er tengill á reglurnar.

 

Miðvikudagur, 08 febrúar 2017 16:02

Samráðsfundur heilbrigðisfulltrúa á Norðurlandi

 

Heilbrigðisfulltrúrar á Norðurlandi vestra og Norðurlandi eystra héldu samráðsfund á Akureyri 2. febrúar sl. Ákveðið var að fara í sameiginleg verkefni m.a. í skipaskoðanir og fylgja betur eftir verkefni um matarsóun sem eftirlitin gerðu í fyrra. Á fundinn kom starfsmaður Neytendasamtakanna,  Brynhildur Pétursdóttir en hún er í forsvari fyrir samtökin á Norðurlandi.  Það var afar upplýsandi að hlýða á sjónarmið Brynhildar og gaf umræðan von um aukna samvinnu Neytendasamtakanna og Heilbrigðiseftirlitsins.  

 

Föstudagur, 20 janúar 2017 15:44

Nýjar reglur um veitinga- og gististaði

 

Gefin hefur verið út, ný reglugerð nr. 1277/2016 um veitingastaði, gististaði og skemmtanahald á grundvelli breytinga sem gerðar voru á síðasta ári, á lögum nr. 85/2007. Væntanlega verða helstu áhrif reglugerðarinnar, annars vegar einföldun á leyfisveitingu til minnstu gististaðanna þ.e. heimagistingar og hins vegar að auka umsýslu sveitarfélaga við leyfisveitingar og minnka tekjur þeirra.

Borðeyri árið 2011

Fimmtudagur, 22 desember 2016 11:33

Gleðileg jól og farsælt komandi ár

 

 

Page 1 of 2